Psa 74 | MMX | STEP | O Moroa. Ua lavasuun teren la u doxoma xepe nema xeretna? Kereva, lebelemamao ram ti limixin akmokso ram naba nemen amisik ta, la noxo xap?

Psalms 74

Lisingising Ti Lox Asepmus Leme Israel

1 O Moroa. Ua lavasuun teren la u doxoma xepe nema xeretna? Kereva, lebelemamao ram ti limixin akmokso ram naba nemen amisik ta, la noxo xap? 2 Una doma limixin taram mo nenu uga soxolik ka axa di gano xusu nedi ataram, la nedi ua uga lam asu ka di at loxokoxo kusu diba ravasu ngan lubungmixin akmokso ram. Una doxoma lakaana Saion, no nenu uga nemen bok be ve. 3 Una vas mavana at loogu laplavang taram ga rem utut; lavamunepen atnema digara sele utut axap pam lempanga ro xeneng teren.

4 Lavamunepen taram digap kup silok tinotno mi lomomo ro xeneng at loogu laplavang taram. Diga lox aurut leven tamon i ru katling lenep silok atnedi, i ngan lampoovo do, nedi diga sak tup minema la diga ruuna ka loogu laplavang.

5 Diga esep ngan luvuttadi ratara una diga tara asi laxanuna mi levenmatao atdi. 6 Diga tit povorok levengkon una diga xovok i at levengkot kitkis, levenora anan, la at laramusaragu mi levenasop la lempatmatao silok atdi. 7 Diga ut tereve xepe loogu laplavang taram la diga song arup laxao ren. Diga lox amexexe rinotno loxot kaala ua limixin diga lotu saparav u. 8 Diga lok do dina vas amdamda axap nema; la diga kotos asi lengkot axap i xaala at na lenep kangka. 9 Ma xopmen na ven bok ba tempanga abis. Kopmen ta teputadi vapaase ali go dik lok, la kopmen teta naklen i do na lumumuat naba nemen at lavanisa maares axap.

10 O Moroa, naba vanisa maares mo na lavamunepen atnema dibang longon sese u? Kereva, diba paase vupu amisik ta ri laasen taram la kopmen tekavaxap teren? 11 Ua lavasuun teren la u ronga xepe ri lok tooro nema? Tila ba uk lok li lukngam to melemu ram?

12 O Moroa, ugarat kis orong silok pam tinema, tu ka axa i at lurutu kaxat at lubung mixin me Israel, la buaang laxanaleng ugak lox asepsu vam nema at levenmumuat. 13 Uga lok langas to at laras mi lolos silok taram, la uga tit povorok lempatlak at laxampanga silok boro xeneng at laras. 14 Uga rit povorok lempatlak at lavatpanga silok ne Levietan, la uga raba lempanga mi lavanuet kangkedek no at lamatbin mi labantuxu ren, tidi ri anan. 15 Uga lok levempuuvut dan mi levendan lixilik digara sen bok ba; la uga lox ames lempatdan sen silok. 16 Uga rudum li laaleng kangking, la laxanimin; uga vaxaxis li laxangking mi lagaaling at luxot atdu. 17 Uga lok li latnese(??) at na lavatbung menemen; uga lok lamaares mi laavat.

18 Ketla, Leeme Silok tarak, unaklen i do lavamunepen taram ding longon sese u, atla diplavang ti levenmoroa xaxarang, kuren la dik sok tixirixes u. 19 Uguta doxoma xepe limixin axap taram; di lok ngan mun limixin pentaae; la uguta ke xepe di kusu dina vubeles at longlong kuxurung at lavamunepen atdi. Uguta domampe limixin taram mo dim suma leveloklok asongot. 20 Una doma laxakaape uga lox i eburu minema kusu una lok tatao nama. Levenekarakat mo ik lok at lengkon meseluk main axap at na lavatkangka. 21 Uguta ke xepe luvuttadi baava kusu dina mangan; una lok tooro mo luvuttadi banbalo mi lavamun panga xusu diba emi asu minu.

22 O Moroa, una beleku kaxat, la una tu xa at lenep taram mumu na levenmumuat atnema. Una doxoma box i do limixin tongtonga xepe ding longon sese amisix u at laxanaleng axap. 23 La uguta domampe leven aknuxup belemamao at lavamunepen taram; mo di ganggang linga amisik taram.